Св. мученикам Антонию, Иоанну и Евстафию Виленским

Святии мученицы Антоние, Иоанне и Евстафие! Призрите с небеснаго чертога на требующих вашея помощи раб Божиих (имена), и не отвергните прошений наших, но молите Христа Бога, да сохранит нас от всякаго лютаго обстояния, да не осудит нас, грешных, по беззаконием нашим, и да не во зло обратим благая, даруемая нам от Бога. Да молитвами вашими даст нам Господь мир помыслов, от пагубных страстей воздержание и от всякия скверны удаление, да мы вси в мире и благочестии поживем в настоящем веце, и достигнем вечныя жизни на небеси, благодатию Господа нашего Иисуса Христа, Емуже подобает всякая слава, честь и держава, со Отцем и Святым Духом, ныне и присно и во веки веков.