Празднование в честь иконы
14/27 марта и 16/29 августа

(Названа по имени Федоровского Городецкого монастыря, в котором первоначально находилась. В XIII веке была перенесена в Кострому и помогала оборонять княжество от татар. “Федоровская” - родовой образ царского дома Романовых, которым были благословлены на царство многие Государи. Почитается как покровительница христианских семейств, помощница в родах и воспитании детей.)

К кому воззову, Владычице, к кому прибегну в печали моей; к кому принесу слезы и воздыхания моя, аще не к Тебе, Царице Небесе и земли: кто исторгнет мя от тины грехов и беззаконий, аще не Ты, о Мати Живота, Заступнице и Прибежище рода человеческаго. Услыши стенание мое, утеши мя и помилуй в горести моей, защити в бедах и напастях, избави от озлоблений и скорбей и всяких недугов и болезней, от враг видимых и невидимых, умири вражду стужающих мне, да избавлен буду от клеветы и злобы человеческия; такожде от своея ми плоти гнусных обычаев свободи мя. Укрый мя под сению милости Твоея, да обрящу покой и радость и от грехов очищение. Твоему Матернему заступлению себе вручаю; буди мне Мати и надежде, покров и помощь и заступление, радость и утешение и скорая во всем Помощнице. О чудная Владычице! Всяк, притекающий к Тебе, без Твоея всесильныя помощи не отходит: сего ради и аз недостойный к Тебе прибегаю, да избавлен буду от внезапныя и лютыя смерти, скрежета зубнаго и вечнаго мучения. Небесное же Царствие получити сподоблюся и Тебе во умилении сердца реку: Радуйся, Мати Божия, Предстательница и Заступница наша усердная, во веки веков. Аминь!