Празднование в честь иконы
26 июня/9 июля

(Первое упоминание о ней относится к V веку. В пределах России была чудесно явлена в 1383 г., в княжение Димитрия Донского, рыбакам, ловившим рыбу на Ладоге. Прославлена великими чудесами: прозрением слепых, исцелением бесноватых. К числу памятных знамений относится защита Тихвинской обители от шведов. Особенно прибегают к этой иконе при болезнях детей.)

Благодарим Тя, о преблагая и пречистая, преблагословенная Дево Владычице, Мати Христа Бога нашего, о всех благодеяниях Твоих, яже показала еси роду человеческому, наипаче же нам, христоименитым людем российским, о нихже ниже самый ангельский язык к похвалению доволен будет: благодарим Тя, яко и ныне удивила еси неизреченную Твою милость на нас, недостойных рабех Твоих, преестественным самопришествием пречистыя Твоея иконы, еюже всю просветила еси Российскую державу. Темже и мы грешнии, со страхом и радостию покланяющеся, вопием Ти: о пресвятая Дево, Царице и Богородице, спаси и помилуй Святейшаго Патриарха Алексия, архиереи же и вся люди, и подаждь им победы на вся враги их, и сохрани вся грады и страны христианския и сей святый храм, и от всякаго навета вражия избави, и всем вся на пользу даруй, ныне пришедшим с верою и молящимся рабом Твоим и покланяющимся пресвятому образу Твоему: яко благословена еси с рождшимся от Тебе Сыном и Богом, ныне и присно и во веки веков.